په تهران کې د جنرال اکرامالدین سریع د وژنې پېښه تر څېړنې لاندې ده
د ایران رسنیو د حسین خوشاقبال، د تهران والي، له قوله راپور ورکړی چې د دغه هېواد مسوول بنسټونه د افغانستان د پخواني پوځي چارواکي جنرال اکرامالدین سریع د وژنې پېښه څېړي.
د راپورونو له مخې، جنرال سریع څلور ورځې مخکې په تهران ښار کې د محمد امین الماس په نوم د بل پخواني افغان پوځي ترڅنګ د برید هدف وګرځېد. هغه وروسته له دې چې روغتون ته ولېږدول شو، ساه ورکړه.
د دې پخواني پوځي د جنازې مراسم پرون، د شنبې په ورځ، په تهران کې د یوه شمېر ایران مېشتو افغانانو په ګډون ترسره شول. ګډونوالو پرته له دې چې د پېښې جزئیات یاد کړي، هغه د هېواد د پخوانیو پوځي څېرو له ډلې ګڼلی.
تر هغه وروسته چې طالبان په افغانستان واکمن شول، د هېواد ډېری پخواني پوځیان اړ شول چې خپل وطن پرېږدي. دا حالت تل د هغوی د امنیت، قانوني وضعیت او په کوربه هېوادونو کې د ضروري ملاتړ د لاسرسي په اړه اندېښنې راولاړې کړې دي.
